monumenta.ch > Hieronymus > sectio 22

Word Selection for Searching

Report an Error in this Sectio
Hieronymus, Epistulae, 3, 78, 22
XX. MANSIO. Et profecti de Caaltha, castra metati sunt in monte Sapher . Vigesima Mansio interpretatur pulchritudo, et in monte decoris est constituta, de qua et quarti decimi Psalmi principium sonat: Domine, quis habitat in tabernaculo tuo: aut quis requiescet in monte sancto tuo? VIDE QUID prosint frena. A vitiis nos retrahunt, introducunt ad virtutum choros, et in Christo, monte pulcherrimo, habitare faciunt. Iste, iuxta Danielem, lapis excisus de monte sine manibus, crevit in montem magnum, et implevit omnem terram . Iste iuxta Ezechielem, vulneravit principem Tyri . Ad istum in Isaia et Michaea populi confluunt, dicentes: Venite ascendamus in montem Domini, et ad domum Dei Iacob: et docebit nos vias suas; et ambulabimus in semitis eius .